يوميات كحياني

كحياني والانتخابات
************
مازالت ردود الافعال تتوالي منذ ان اعلن كحياني عن مفاجأته وهي ترشيح نفسه عضوا بمجلس الشعب عن دائره الكحيانيين ..وما ان سمع اهل حاره الكحيانيين بالخبر الا وقد اجتمعوا علي القهوه مساءا ..ودار الحوار ...
= والله ..انا من ساعه ماجه معاه البيه الكبير اللي كان جايبه يقعد معانا ده ..وقعد يقولنا الكلام اللي ماعرفناش ولافهمنا منه حاجه ده ..وانا بقول الموضوع في حاجه ..
= ياجدعان لاحاجه ولابتاع ..شويه وانا بعت للاستاذ/ ( رافع ) الافوكاتو بتاع الحاره ..وهوه هايجي يفهمنا ويرسينا ..
= ياعم لامحتاجه افوكاتو ولاحاجه ..انا سمعت ان هما اشتروه ..من يوم ماعمل الكام داهيه ايام مائده الرحمن ..ولما صيته ظهر في المؤتمر العالمي ..قالوا اهه نلمه ونخليه تبعنا
= ياناس افهموا بقي ..يشتروا مين ويلموا مين ..الكلام ده كان قبل الثوره ..دلوقتي مافيش كلام من ده ..وياحسره هايشتروه علي ايه ..هوه لاقي ياكل ..ده عامل شعاره ( عيش ناشف ) ..بلا خيبه ..بطلوا عبط ..
وفي هذه اللحظه حضر الاستاذ/ رافع ..افوكاتو الحاره
= كنا بنقول انهم اشتروا كحياني يااستاذ ..عايزين رأيك
= فعلا ..انا مع هذا الرأي ..ولكن في اختلاف رئيسي وجوهري ..لايندرج من عموميه الفكره ..ولكن من جوهرها ..وهو ان الشراء كان ( معنويا ) وليس ( ماديا ) !!!
= والنبي ياستاذ تكلمنا عربي كده وبالبلدي ..علشان نبقي معاك ..
= ياجماعه انا اقصد ان كحياني مطمع بما يملكه من اصوات حزبه وهم العاملين معه ..واللي هوه الزعيم بتاعهم ..وليس مطمع بمايملكونه ( لانهم ماديا مايملكوش شيء ..ومش لاقيين ياكلوا ..ومش ماشيين جنب الحيط ..دول بقوا جوه الحيط ) ..
= والاصوات دي بتعمل ايه ان شاء الله ..بيشتروا كل صوت ويدفعوا عليه فلوس يعني ..ماتأخذناش يابيه ..بقالنا 30 سنه لانعرف انتخابات ولابتتعمل ازاي ..ولابنحضر حتي ..لولا بقي كحياني رينا يجازيه هوه اللي هايفكرنا بالحاجات دي تاني ..
= يشتروا اصوات ايه يامعلم ...الكلام ده اتلغي خلاص ..الثوره مسحته ونتمني ان مانشوفوش تاني ..انت صوتك بقي سلاحك دلوقتي ..انت اللي تحارب بيه ..مش تبيعه لغيرك ويشتريه ....
= ( صوتنا نحارب بيه ...مش نبيعه لغيرنا ويشتريه ) ...ياسلام ياستاذ ..سيادتك متأثر قوي بالكحلاوي ..انا كنت سمعته وهوه بيقول الموال ده ..ووو
= كحلاوي !!! ..كحلاوي مين يابني ادم ..وهوه الكحلاوي كان ايام الانتخابات ..انا قصدي اقول انك تملك صوتك ومادام الزعيم رشح نفسه فيبقي كل اصوات الاتباع يملكها الزعيم ..ومن هنا القوه المعنويه للزعيم ..الي هيه هاتكون في الانتخابات بعد الثوره الاساس ..لان القوه الماديه كان عهد وانتهي ...فهمت ..
= طب وايه رأي سيادتك ..انا سمعت ان هما اشتروله تليفزيون مايذيعش الا اخباره وصورته بس ...
= تليفزيون ايه.. ياحمار ..اسمه قناه تليفزيونيه ..بتتأجر وقت الانتخابات وتذيع اخبار الزعيم ..وبعد كده مالوش دعوه بيها ..
وفي هذه اللحظه يرن موبايل الافوكاتو ..ويستأذن الجميع وينصرف لامر خاص به ...
معلم القعده يوجه كلامه لرجاله الحاره ..
= جتكم البلاوي ..مافي مره تشرفونا وتحسسوا اللي قاعد انكم فاهميين ..كل مره تكسفونا كده ..الله يكون في عونك ياستاذ كحياني ..دي اصوات هاتعتمد عليها ..
_____________________________________________________________
اما الوضع في بيت كحياني فكان مختلفا ... فماذا حدث ؟؟ ومارد فعل ام العيال علي مافعله كحياني من ترشيح نفسه ...تابعونا غدا ..كل الاخبار حصريا علي ( كحيانكو ..تي في ) ..وكله اكسوكلوسيف ..ويجعله عامر ان شاء الله ..